奇牌

話說自從中學時代學曉打麻雀這種國粹之後, 多年以來都只是鍾情於廣東牌, 從未涉獵其他種類玩法, 曾試過於同學屋企打足四日三夜贏十蚊, 亦試過四圈輸二千幾, 雖然諗落真係有啲無謂, 既傷身又浪費時間.........甚至有一段時間好少打牌轉打排球, 保齡同埋唱K!

但自從數年前試玩台灣牌之後, 非常喜歡它的多變化, 唔駛好似廣東牌咁, 撞啱爛牌摸都手爛都砌唔到三番(因為唔打花) , 成日要焗住做牌!!! 台牌唔同, 變化多, 易食糊仲可以拉人, 幾過癮!!!

十月尾同業SIR, 肥肥, Bel Bel(我同artman打一家)係佐敦雀會打牌, 就俾我食咗一鋪超大奇牌! 自問自己都幾有大牌運, 四喜都摸過兩次, 大三元混一色, 門清清一色自摸兩暗龍, 刻刻糊, 力高一糊兩吃等等.............. 但係今次呢鋪都算最大囉!!!

請見下圖:


話說鋪牌起手九隻萬子, 有兩隻番子, 一隻筒子, 四隻索子(無記錯係二,四,四,五索), 跟住就萬子摸吓多隻摸吓多隻, 開頭諗住做缺一門快靚正, 點知一路都無三,六索, 仲有地下無人打萬子, 打極都凈係一萬, 自己又越摸越多兼起對, 弊啦點算呢? 唯有且戰且走, 一於拆索子, 當時索子都唔係好安全㗎, 好彩三五索都有人打過, 見步行步啦!!!! 摸隻七萬入去打剩最後隻四索(當時揸住二二三三三四四五五六七七八八九九萬), 當時我都未知叫幾飛, 凈係知二,三萬實食! 點知一轉頭摸隻一萬喎! 仆街食唔食得㗎! 諗咗好耐, 諗住叫artman俾意見啦, 佢話睇咗其他人既牌no say喎..........My God!!! 當時有諗過打二萬, 因為手揸咁多二三萬應該無事掛, 仲可以較龍添, 但諗深一層真係出沖咪笨seven......... 一於扮晒嘢咁打返隻一萬出街話應該無事掛!!!!!!!

點知摸咗一round之後就摸咗隻六萬入去!!!! 我開頭都唔肯定食唔食得, 你知太多同款式既牌會眼花㗎!!!

當肯定食糊之後開牌嗰陣諗, 如過無打隻一萬咪有兩暗龍囉........ 點知我上家呀Bel突然講咗兩個字........力高!!!!!!!! 個剎那幾震憾我個心靈!!!!

無錯.........又係一糊兩吃...........仲要係清一色!! 多謝家家201番!!!!!!!

我諗打牌咁耐呢鋪都算係代表作!!! 值得記念!!!!!!

復出

自從公司block咗blogger之後, 已經很少機會寫嘢同埋跟網友閒聊! 為甚麼不在家裡寫blog? 原因很簡單.........我不熟悉PC機也不懂倉頡, 簡易及速成輸入法, 小弟係公司係用MAC及用廣東輸入法; 一返到屋企等於跛手跛腳........所以在家的時候很少上msn或寫blog!!! 但係自從搬咗上12樓之後, 公司就無再block, 唔知係management唔記得定係咩原因??? whatever....... i dun care!!! 可以寫得blog就算啦!!!

簡佈一吓呢幾個月做咗乜:
1. 公司係七月中俾人買咗, 換咗大老闆.......所有做事方式當然要從新適應.......希望經過一輪裁員, 重整架購之後工作會轉趨穩定順利!
2. 一年一度ARC公佈, 今年都算豐收, 囉咗26個獎項, 仲囉埋Titanium Achievement (Highest % awards winning)!
3. 八月頭同artman去咗英, 法旅行.......景超靚........法國嘢超好食!!! 遊記請移玉步往www.artmanartman.blogspot.com
4. 八月尾去咗澳門睇憶蓮演唱會and喪食一番, 相片都係去www.artmanartman.blogspot.com
5. 公司係九月宣佈將集團兩間公司合併, 仲要搬office上12樓........救命!!!每兩年搬一次, 不過今次我個位有窗, 都幾ok㗎!
6. 整個九月都係籠罩住工作前景唔明朗問題, 非常depress!
7. 十月開始每年一次既member volleyball competition...... 今年自己對波是非超多.......有麻煩人攪是攪非........我決定唔會再理會呢嗰麻煩人........打埋今年退役!!!
8. 工作上開始明朗化, 結果係好壞參半啦.........算罷........一日未中mark six, 都總係要做既! 生活就係咁.....甜的吃, 苦也吃, 屎都要吃!!!!!
9. 家庭多了新成員, 詳情見www.artmanartman.blogspot.com

簡報完畢!!! 多多包涵!!!!

說謊

如果說謊言可以令別人開心愉快.......那是聰明!
如果說謊言可以令事情進行順利.......那是智慧!

但是.......如果說一個不聰明又沒智慧的謊言而令人尷尬.......那是蠢!!!

香港環島一日遊

話說剛過去既星期二簡直就同走難無分別!!! 一朝早十點由西營盤去觀塘跟印刷, 點知同事做既file鑊咗, 直刻飛車返中環公司補鑊啦! 返中環之際, 同事Karen打電話問我記唔得下晝要開會.........開咩會呀????? 完全無印象, 佢用好sweet既聲線話俾我知.......So Sir! 今日下晝四點半元朗博愛醫院賽馬會老人院開會呀嗎!!!!!!! 望吓個錶, 好似已經十一點啦, 拿拿臨飛車返公司!!!!! 飯後兩點半再由中環去多次觀塘, 睇埋色都三點九即刻飛車去元朗, 原半諗住坐268C, 但係真係趕唔切, 觀塘又熱又無巴士, 由開源道行到創紀之城, 成身濕晒, 決定call車啦!!!!! 去到元朗啱啱四點半, 開完個會五點九, 離開博愛個陣直頭想行過隔離急症室, 攰到想死, 跟住走去搭968返中環, 返到公司都成六點半, 工作先至開始! 坐都八點三雞咁腳返屋企囉衫去西灣河打波, 打完波當然例牌老銅食late dinner啦, 返到屋企已經凌晨一點啦!!!!

是日行程:
西營盤 > 觀塘 > 中環 > 觀塘 > 元朗 > 中環 > 西營盤 > 西灣河 > 銅鑼灣 > 西營盤

暈低!!!!

七月十四Again

七月十四號關我咩事呢？

小弟工作的公司上市一周年! 不過已經賣盤啦!!! 之後仲駛唔駛慶祝都未知!!!

小弟以前的兩個男友都係七月十四號生日, 幾邪!!!! 另外artman話佢係遲出世咗廿鬆啲日, 如果准時出世都係七月十四號喎, 令事件更添懸疑!!!!! 怪談................ 最賤就係好友Billy臨近十二點都仲打電話嚟話記唔記得啲嘢.......記你個死人頭!!!!!!

吹漲!!!!!

懶? 心情低落??

六月過了一半, 一片文章也寫不出來, 是甚麼原因令自己這樣疏懶?? 得出原因有以下幾點:

1. 睇波..........月初整整一星期的瑞士女排精英賽, 晚晚睇波睇到半夜三,四點, 仲邊有精神寫嘢! 對於由蔡斌作為主教練的新中國女排的表現......就係: 速度慢, 技術粗, 戰術簡單..........差!!!

2. 羽毛球..........多了運動, 體力消耗了, 身體還未調節好復原節奏!

3. 工作..........最不希望發生的事終於發生了, 金融海嘯殺到本公司了, 原來作為一個小小部門主管可以做的真的好有限, 兄弟們, 希望你們諒解, 我也是身不由己, 很多事不由我決定與控制! 一剎那........心情非常低落!!!!

4. 天氣...........持續兩三星期的陰晴不定天氣到底幾時完呀???? 都係想多享受陽光與海灘啫! 俾條路行吓好無!!!!

5. 失眠.............由於屋企樓上的冷氣機滴水, 啲水滴落我房間冷氣機頂, 晚晚好似打鼓咁!!! 有無人可以話俾我知, 到底係樓上負責定係要自己攪??? 有無得complain㗎????

唉! 呢個星期仲有意大利四國邀請賽睇, 冷氣機問題仲未解決, 天氣就好咗啲, 工作就唔諗太多啦, 希望一切向好出發!!!!

私房菜@傳說中的崩牙成

話說上星期老闆話帶小弟去食一間私房菜, 咁我問食乜囉??? 老闆回應說..........崩牙成(說時電光一閃, 晴空霹靂........ 頭微微向上仰起, 直有超然物外隱世高人出場之感)!!!!!!!!!!!!!! Sorry, 我孤陋寡聞......... 真係唔識!!!

終於上星期五放工老闆帶咗小弟去上環畢街一間無射燈, 無招牌, 無裝修, 無嘉賓題字, 無制服既一間(百無)私房菜, 席間仲有老闆友人及同事們足有一圍!!

心裡不禁弧疑...... 乜料呀.......崩牙成佢係邊個?????

原來佢係傳奇人物南海十三郎爸爸江太史公個家廚李才既徒弟, 今年九十三歲, 五十年代已做到會和私房菜, 以鮑參翅肚作主打； 出名用料靚兼重手，吃魚翅仿如吃麵；更沿用炭爐煮食，風味一絕；炒飯更妙，煮好後壓平攤在竹筲箕待涼再炒，乾爽分明。不過，崩牙成已退休, 只接熟客生意。熟客係邊啲........你講得出既富豪都食過!!! 以上資料都係小弟食完之後係網上找的, 粗略都有三四十個網站報導, 足見佢個"朵" 幾勁!




講講今晚既菜單:
1. 炒素翅
2. 炒肚尖
3. 炒老虎斑球
4. 扒鮑魚
5. 子薑蒸雞
6. 竹笙鮮菇湯
7. 生炒糯米飯
8. 紅荳沙




用料十足, 不像外邊所吃的魚翅炒旦, 它有芽菜, 魚翅, 旦, 芹菜, 雞絲, 冬菇, 芫荽, 蟹肉, 冬筍絲, 韮王等等. 普通酒樓是無法可以吃到這種桂花翅. 炒得很乾身, 調味料很少, 吃到配菜真正的味道.



一隻豬肚最多可以切出四至五塊小片的肚尖, 試想一大碟肚尖是用多少個肚. 再加上廚師配上欖仁, 椒絲, 韮王, 荀絲, 咸菜絲, 味道突出同埋超爽口!



咁厚既老虎班肉炒起嚟唔多油, 肉又彈牙, 仲要咬落有嚼頭, 但又唔老, 功夫可見一班!!



自問出得大場面少, 吃鮑魚機會不多, 但係今次食的鮑魚真的與眾不同, 獻汁不是那種嗆喉蜜汁金華火腿蠔油味, 是老雞跟火腿再加蠔油配合到剛剛好, 越㗳越濃厚的感覺, 跟鮑魚配在一起, 越越有味, 又不捨得吞落套, 鮑魚有嚼頭.......不太腍, 不太韌.......Perfect!



令我非常驚喜的一味菜, 子薑很清甜而微微帶少辣, 將雞皮的肥膩感辟去.....加上雞肉非常嫩滑(包括雞胸).......子薑的爽配雞肉的嫩滑......絕配!!




非常鮮甜, 同事teresa小姐話好鹹, 我就唔覺, 可能佢外國返嚟食唔慣傳統粵菜嗰種重味道的烹調方法, 同事黎總同我就讚不絕口, 最愛那厚厚的竹笙, 又軟又滑......加埋鮮菇同埋大量芫荽...... 一流!!!!




糯米飯炒得超乾身, 臘味絕無半點"油益" 味道..........靚料! 食落絕無半點油膩飽漲感, 而且臘味甘香撲鼻而來........功夫一流!!!



紅荳沙要煲都起沙唔難, 但係要煲都起沙得嚟唔削又軟綿綿, 就一啲都唔簡單, 食落仲有淡淡的炭火香味, 據同事epo告知, 佢地係用炭爐煲足廿四小時!!! 而資料報導話: 廚師很有耐心地把豆殼撇開, 留下的是真正的沙, 再用生粉打個獻使沙和湯連接在一起......... 簡直人都癲!!!


是晚令我品嘗到一些久違了的味道, 享用一餐唔知仲有無下次的晚飯, 同埋認識到一個傳奇人物的故事, 多謝老闆!!!

只有兩個遺憾, 第一就係無同artman一齊嚟, 第二就係掛住打牌無添食紅荳沙就走咗........晒料!!! 是晚每一道菜我都encore, 有些更添完再添 因為分量實在很足, 十三個人, 十六,七個人分量..........!!!!!!!

咁到底一圍要幾錢呢? 好似要$12,800.........我落樓就$1,100! 我覺得ok喎....... 唔算貴!!!! 不過各友人唔好問我點樣可以訂檯, 第一佢地好似無名片呢樣嘢!!! 而據我所知, 佢地好似凈係做熟客, 即係你要係某某富豪啲friend呀, 再搭上搭先至做!!!!!!

七周年.......晚飯前.......

今日係小弟跟artman一起七周年, 有甚麼慶祝? 因為是星期一.........所以沒有安排大事慶祝, 只是晚飯一頓, 地點是artman安排, 執(筆)之時還未知道確實地點, 只知道是尖沙咀........至於禮物, 大家都決定不買禮物了! 原因有五:

1. 我相信買禮物對雙方都是苦差事一件, 因為artman是實際形, 花巧東西不是他那杯茶, 日用品方面....他所穿的, 用的, 戴的, 我都買晒, 仲要個個月買, 仲駛乜特別買禮物喎! 實在想不出來了........只好放棄好了!!!! 至於我本人就是一個非常挑剔奄尖聲悶嫌三嫌四既三八, 送得唔啱心水會即刻藐住咀講多謝嗰種人, 我係嚴重拒絕枕邊人送嗰啲花巧唔實用得個靚字同埋扮晒浪漫既裝飾品俾我, 例: 水晶擺設, 靚靚玻璃杯, 畫連靚靚畫框, 電影poster, 毛公仔, 心形相架, 唔等駛頸巾, 成set嗰啲襯晒顏色pattern既毛巾+浴袍+牙刷+內衣+手帕+........., 真係諗起擺呢啲嘢係屋企, 唔清潔又唔得, 清潔掃除就抹塵抹餐死........我同佢都咁懶.....仲買呢啲嘢???? 唔好玩啦, 咪送呀!!!!!!!

2. 金融海嘯下你話無影響就假既, 最大影響應該係工作環境的不安穩不踏實的感覺, 實在沒有必要亦沒有心情作無謂浪費買禮物, 用嚟食落肚仲實際! 我同佢既嗜好都係鍾意食嘢!!!!

3. 今年八月artman生日之時, 應該會去跟他去旅行, 地點應該是歐洲吧! 可能是挪威+芬蘭.....可能是倫敦+巴黎......也可能是布拉格+布達佩斯+維也納, 雖然英鎊及歐元都已經比高峰期有所下調, 但係花費應該不會太少, 所以省點錢不買禮物也不為過!!!!

4. 踏入第八年, 我渴望的更多是細水長流的細心關懷, 包容諒解, 雙互尊重鼓勵和進步!

5. 買靚嘢從來都不是artman的強項, 直接給我現金好了! (全日重點)

寵物

從小到大, 我對於養寵物都抱著猶疑的心態, 到底是愛心不夠或是耐心不夠, 自己都弄不清楚!

跟小動物無緣份麼? 不算是!!! 數數吧.....

1. 沙皮.......澳門外婆家的黑色沙皮狗, 兇巴巴的, 樣子絕不討好, 只可遠觀, 絕不可以跟它嬉戲, 典形守門口狗, 聽表姐們說, 其實佢甚為忠心盡責, 好狗一條!
2. 烏嘴.........唐狗一條, 非常友善, 甚為討人歡心, 但現在回想, 我覺得佢有少少吞POP, 無沙皮咁盡責!!!! 但係佢完全懂得生存之道!!!
3. 鴨仔...........無錯佢地係一對鴨仔, 名字忘了! 好似都係叫鴨仔, 最后既下場係做咗燒鴨, 做咗我地全家人既晚餐, 記得佢地變身燒鴨嗰晚, 我有唔開心㗎, 不過自始之後就知道家禽類既命運都係差唔多, 決定以後都唔養!!!!
4. 衰仔貓.........佢係一隻全身黑色, 四隻腳掌, 下巴同埋心口白色既貓, 係我屋邨時代養既貓, 諗番起其實都好內疚, 成日都縛住佢, 又無固定toilet俾佢, 佢小便係其他地方, 我地又打佢, 佢叫春我地又打佢, 真係要不得!!! 後來屋邨遷拆, 父親話轉贈給友人........我懷疑佢做咗流浪貓! 如過時光倒流或依家佢先至出現, 我諗我會幾鍾意佢!!!
5.Well Well...........黑,灰間家貓一隻, 友人正君養的一對貓其中之一, 性格較cool及怕羞之外, 其實都幾乖㗎!!! 九四年正君家住屯門, 世界杯既時候, well well已經半歲大啦!!! 隨住正君九八年成為我flatmate, well well就成為家庭成員之一!! 佢最鍾意我既床下底, 成日就入去玩隱形!!! 據正君告知, well well年紀大了, 生咗cancer, 身體大不如前, 希望佢唔好受咁多痛苦啦...........但我又怕well well走咗, 小白會寂寞!!!
6. 小白............正君的另一隻貓, 純白肥貓一隻, 性格超級溫純又唔怕人, 絕少發脾氣, 唯一決點.......怕凍, 所以熱水爐頂係佢既私家重地, 無人同佢爭, 佢係唯一一隻見過我全裸既貓!!!! 佢通常係熱水爐取暖之候就會做其暖水袋角色, 溫暖well well入睡, 一等一gentleman, 雖然佢係奄貓一隻!!!! 係夏天佢兩隻就鍾意訓洗手盤, 攪到好次成個"太極" pattern 咁!!!! 超攪嘢!!!!! 祝願小白都身體健康!!!!!
7. 冬冬..............哥哥於九二年搬遷至樂富時買回來的松鼠狗, 樣子超得意, 好似成日係度笑咁樣, 性格好友善活潑, 又唔怕人, 可以同全世界既人同埋狗做friend!!! 隨住小狗年紀漸大, 活動能力大減, 我好擔心佢會走, 因為我知道父親大人真係好錫佢!!!!!! 佢都陪伴咗父母足十七年了!!!!! 直至現在唯止, 冬冬亦都係跟緣份最耐的小動物!

雖然很多友人家裡的貓狗寵物確實非常可愛..........J小姐的史納沙.........雀友Adam們的牧羊狗........舊同事的灰色短毛貓!!!!!!! 也確曾讓我興起養寵物的念頭, 但我還是怕生離死別的傷感, 還是怕照顧不周的內疚, 還是怕外遊遠行的牽掛..........所以還是免了!!!! 我不是一個好主人!!!!


小白與我



冬冬

幾乎唔記得孩童時代好似養過雀, 通常個多星期就會因為餵雀唔記得閂雀籠而飛走咗, 我記得最少有兩次!!!!!!

保齡, 保齡, 男女喜愛玩球.........

數我喜愛的運動, 除排球外就要到保齡球了! 話說89年開始已經約同事到南華會打波, 最瘋狂時更試過一口氣打十四個game既紀錄, 仲買埋私家波同私家鞋, 打過過二百分㗎! 亦曾經勇奪奧美廣告個人與隊制雙冠軍添(掌聲唔該)!!!!!!!

上星期五放假無事做, 又無牌打, 於是就同artman去咗奧海城"碌令", 根據過往成績都係我贏多, 所以明"屈"佢.......五局為限.......邊個輸邊個請打波..........佢都認為我應該贏佢, 點知........引用伍晃榮先生個句.........波係圓既!!!




artman的"碌令"風采!!!! 讚!!!!!!


比賽開始...........初段仲算爭持激烈..........之後呢...........雙方無謂失誤勁多...........我就直頭入唔到局.........成績核突都嘔.........輸.........仲要唔過百........好很肉酸!!!



之後嗰四局互有輸贏, 比賽亦拖至決勝局, 好在小弟心理質素還可以, 頂住壓力, 贏咗artman!!! 但過程絕不輕鬆, 真係退步得交關! 睇嚟都係要多加操練!!!

第二局......我贏, 第三局.....我贏, 第四局.....佢贏, 第五局.......我贏!!!! 五局加埋我得585分, 佢有569分, 我贏16分......每局都係贏三分幾咋, 好險!!!!


之後去咗food court醫肚之後再睇永久居留, 所以都係食啲快餐, 水準一般啦, ok囉!









後記: 有件港女經過杯利賓納後面個公仔既時候, 驚叫(八婆聲線): 嚇死我啦, 我以為係人扮㗎!!!! 唉...........港女=弱智=低能=無腦=來自丟那星!!!!!!!!!

牙齒

由四月開始, 不知道是冥冥中有安排又或是純屬巧合, 一系列牙齒問題衝著本人而來, 逼使我面對迴避多年的問題。

擁有一棚潔白牙齒對我來說是一件遙不可及的事情, 因小人自小多病, 食藥多過食糖, 尤其是醫哮喘的四環素食得最多, 長年累積下未滿十八歲已是灰牙滿口, 所以小人絕少咧齒而笑!!! 長大之後又因為牙齒長得不美而自暴自棄, 更疏於護理, 蛀牙是家常便飯, 每五年剝一隻!!!! 試過有隻牙蛀到無咗一半斷埋都無理, 結果農曆年初二大爆發, 撕心裂肺痛足六日, 到初八先至剝!!! 另外一隻06年去美國已發現蛀咗, 等咗三年先決定引刀一快!!!

話說回來, 到底四月發生乜事呢?
1. 朋友"老鼠" 試咗做牙齒美白, 效果不錯, 更有試做, 當然心郁啦! 所以咪試吓囉!!!!
2.上面講過06年蛀咗嗰隻牙, 真係越蛀越大, 仲好似影響埋隔離嗰隻添, 講真, 我唔怕剝牙, 但我怕下面棚牙會越剝越疏, 開始擔心了, 而且鑲假牙好似好很貴, 留番嚟買衫都好過益牙醫!!! 無辦法啦......... 最好唔駛剝啦, 剝一隻都願啦, 如果剝兩隻再鑲兩隻, 無三萬落唔到樓!!!
3.老父早年由於疏於護理牙齒, 大部分牙齒早已脫得八八九九, 但眼見佢越嚟越瘦, 想必是食得唔好, 而政府醫院配的假牙quality又唔好, 又要排期, 等得嚟我怕餓瓜咗佢........做仔既都係時候做啲嘢啦!

結果又點呢?
1........咁當然係俾班姐姐sale掂咗嗰plan啦, "老鼠"做咗七個sesson已經好白吓, 我應該要double時間同埋錢, 廿個sesson落樓HK$6,980!!! 希望到時棚牙會令你地眼前一亮啦!!!
2. 大步檻過, 唔駛剝, 補幾隻再洗牙就ok啦, 分三次做, 大約HK2,500左右.........還得神落啦!!!
3. 老父就大鑊啦......要剝六隻斷牙再做成副假牙, 手術連倒模, 落樓HK$13,500!!! 梗係我俾啦!!!! 但係都要等兩三個月, 老竇, 食住粥先啦!!!

原來護理牙齒真係好重要, 前後兩星期就無咗兩萬啦, 你地試吓計一計, 剝一隻牙再植一隻假牙大概要三至四萬(以香港價值計算), 成年人共有32 顆牙齒：分別是八顆門牙、四顆犬齒、八顆小臼齒及12顆大臼齒, 要整晒成棚牙都要百幾萬, 仲要唔包一定植得到牙, 而且假牙食嘢無真牙嘴嚼食物而感受味道的感覺。所以諸位朋友, 你地都要好好護理呢啲終生伴侶!!!

獎座來了

等咗超過四星期既grand winner獎咗終於到手, 沒有想像中的喜悅, 心中暗忖應放在家中邊度呢?? 都底放邊度好呢? 弊........屋企又多咗一件因虛榮而擁有既身外物, 雖則話用嚟陪葬啫, 火化燒唔到個喎!!!!諗諗先!!!!

錯晒

我係早幾日寫嗰篇有關於On Pedder Display既Blog有回應喎!

話說有個聰明人閱畢後, 就盲中中咁走咗入去LV問有無環保袋賣, 點知俾個sales串............無喎(謝天華腔口).........仲話! 呀生, 你係咪話嗰toll pack 袋(唔知係咪咁寫)..........盛惠HK$6,xxx!!!!!!

聰明人........我無話係LV喎!!!!!!! 你知我同LV無乜緣份㗎! 你知㗎! 你了解㗎! 了解呀.......你明㗎!!!

我好感謝你同我去撲, 但係我真係同LV無乜緣份囉!

我講嗰個袋係Dylan's Candy Bar既環保袋, 小弟已經擁有啦!!!! 現讓諸位兄弟姊妹一睹為快!!!



再一次感謝聰明人, 累你白走一趟......心領了! 我覺得如果著你買俾我嗰條粉紅Speedo泳褲, 或者著訂番嚟嗰條Bare Back紅橙泳褲, 再配粉綠短褲加deep V心口有紫紅閃彩Pattern嗰件T恤, 著埋你係泰國買嗰對Havaianas白色人字拖...........拎埋呢個袋係中灣行個圈..........肯定俾人怒啤囉!!!!

中坑的回憶

上個月月尾睇咗Superband演唱會, 即係羅大佑, 李宗盛, 周華健同埋張震嶽, 如果唔係舊老細TK叫話一切睇, 我諗我未必會留意! 當然用得Superband嚟做號召梗係有jam歌, 合唱同埋個人獨唱部份啦! 佢地今次揀既歌比較冷門.......我好熟既歌佢地無唱, 所以識唔夠一半歌, 我想聽周華健既花心, 醉, 孤枕難眠, 明天我要嫁給你, 濃情化不開...........張震嶽既秘密, 愛我別走..........李宗盛鬼迷心竅, 羅大佑既愛人同志, 亞細亞的孤兒兒, 之乎者也.................全部欠奉...........你話唔失望, 假既!!!!!!! 雖然係咁, 但完全無影響我欣嘗既興至, 畢竟佢地真係一個年代既巨人, 貨真價實, 在表演裡的大度與淡定唔係一般歌仔姐仔可比!!!!

run down 如下
01 鄉親父老
02 公路
03 MEDLEY: 鹿港小鎮
04 MEDLEY: 分手吧
05 MEDLEY: 我终於失去了你
06 MEDLEY: 愛相隨
07 MEDLEY: 亡命之徒

--- 周華健 ---
08 MEDLEY: 穿過你的黑髮的我的手
09 MEDLEY: 為你我受冷風吹
10 MEDLEY: 傷心的歌
11 MEDLEY: 怕黑
12 似是故人來
13 天龍八部之難唸的經

--- 李宗盛 ---
14 當愛已成往事
15 讓我歡喜讓我憂 with 周華健
16 愛情有什麼道理
17 我是一隻小小鳥

--- 張震嶽 ---
18 路口
19 我要錢
20 MEDLEY: 愛情你我他
21 MEDLEY: 自由

--- 羅大佑 ---
22 美麗島
23 MEDLEY: 現象七十二變
24 MEDLEY: 鹿港小鎮
25 你的樣子
26 天使的眼淚 featuring 張震嶽

--- 縱貫線 ---
27 歌
28 風兒輕輕吹
29 東方之珠
30 戀曲1990
31 愛之初體驗
32 皇后大道東
33 亡命之徒
34 再見

ENCORE
35 真心英雄
36 朋友

個人嚟講, 雖然覺得周華健唱歌較為做作, 花腔甚多.......有啲似陳慧嫻!!!!!!!! 但是晚佢唱為你我受冷風吹, 真係好得!! 讚!!! 羅大佑不愧為音樂教父, 舉手投足都自有攝人氣度, 咁先係真正殿堂級唱作人; 張震嶽唔駛講啦, 佢唱Live仲好杷CD; 李宗盛俾我既感覺係英雄遲暮, 雖然當愛已成往事依然令人感慨萬千, 無論諗起既係已逝既哥哥或憶蓮或歌手本身或聽眾本人..........真係感慨萬千, 另外跟華健合唱讓我歡喜讓我憂真係好麻甩, 好佬.........不過別有韻味......好! 其他既合唱部份李宗盛佢好似唔係好夠氣同埋齋夾口形, 好似啫, 可能我睇錯!!!!

是晚有好多殿堂人物撐場, 有林青霞姐姐, Eason, 徐小鳳姐姐, 劉青雲伉儷等等...........Ms. 東方不敗依然明艷照人, 身型就略豐滿......無計啦, 闊太喎!!!! 徐小鳳姐姐依然雍容華貴...........郭靄明keep得好好!!!!!!! 唔知憶蓮有無嚟呢????

今次之後, 有兩位大哥隨住年事漸大, 唱唔唱到都未知, 所以今次呢個演唱會相當滿意!!!

先知先覺

係上年冬天至今年一月既時候, 小弟係自己既作品裡面已經好大膽咁選用螢光色, 而家諗番轉頭, 都可算係先知先覺, 行家睇見仲以為我真係跟得咁貼...... 其實都係平時夠八卦, 乜都睇一餐, 所以話做design真係唔懶得!