保齡, 保齡, 男女喜愛玩球.........

數我喜愛的運動, 除排球外就要到保齡球了! 話說89年開始已經約同事到南華會打波, 最瘋狂時更試過一口氣打十四個game既紀錄, 仲買埋私家波同私家鞋, 打過過二百分㗎! 亦曾經勇奪奧美廣告個人與隊制雙冠軍添(掌聲唔該)!!!!!!!

上星期五放假無事做, 又無牌打, 於是就同artman去咗奧海城"碌令", 根據過往成績都係我贏多, 所以明"屈"佢.......五局為限.......邊個輸邊個請打波..........佢都認為我應該贏佢, 點知........引用伍晃榮先生個句.........波係圓既!!!




artman的"碌令"風采!!!! 讚!!!!!!


比賽開始...........初段仲算爭持激烈..........之後呢...........雙方無謂失誤勁多...........我就直頭入唔到局.........成績核突都嘔.........輸.........仲要唔過百........好很肉酸!!!



之後嗰四局互有輸贏, 比賽亦拖至決勝局, 好在小弟心理質素還可以, 頂住壓力, 贏咗artman!!! 但過程絕不輕鬆, 真係退步得交關! 睇嚟都係要多加操練!!!

第二局......我贏, 第三局.....我贏, 第四局.....佢贏, 第五局.......我贏!!!! 五局加埋我得585分, 佢有569分, 我贏16分......每局都係贏三分幾咋, 好險!!!!


之後去咗food court醫肚之後再睇永久居留, 所以都係食啲快餐, 水準一般啦, ok囉!









後記: 有件港女經過杯利賓納後面個公仔既時候, 驚叫(八婆聲線): 嚇死我啦, 我以為係人扮㗎!!!! 唉...........港女=弱智=低能=無腦=來自丟那星!!!!!!!!!

牙齒

由四月開始, 不知道是冥冥中有安排又或是純屬巧合, 一系列牙齒問題衝著本人而來, 逼使我面對迴避多年的問題。

擁有一棚潔白牙齒對我來說是一件遙不可及的事情, 因小人自小多病, 食藥多過食糖, 尤其是醫哮喘的四環素食得最多, 長年累積下未滿十八歲已是灰牙滿口, 所以小人絕少咧齒而笑!!! 長大之後又因為牙齒長得不美而自暴自棄, 更疏於護理, 蛀牙是家常便飯, 每五年剝一隻!!!! 試過有隻牙蛀到無咗一半斷埋都無理, 結果農曆年初二大爆發, 撕心裂肺痛足六日, 到初八先至剝!!! 另外一隻06年去美國已發現蛀咗, 等咗三年先決定引刀一快!!!

話說回來, 到底四月發生乜事呢?
1. 朋友"老鼠" 試咗做牙齒美白, 效果不錯, 更有試做, 當然心郁啦! 所以咪試吓囉!!!!
2.上面講過06年蛀咗嗰隻牙, 真係越蛀越大, 仲好似影響埋隔離嗰隻添, 講真, 我唔怕剝牙, 但我怕下面棚牙會越剝越疏, 開始擔心了, 而且鑲假牙好似好很貴, 留番嚟買衫都好過益牙醫!!! 無辦法啦......... 最好唔駛剝啦, 剝一隻都願啦, 如果剝兩隻再鑲兩隻, 無三萬落唔到樓!!!
3.老父早年由於疏於護理牙齒, 大部分牙齒早已脫得八八九九, 但眼見佢越嚟越瘦, 想必是食得唔好, 而政府醫院配的假牙quality又唔好, 又要排期, 等得嚟我怕餓瓜咗佢........做仔既都係時候做啲嘢啦!

結果又點呢?
1........咁當然係俾班姐姐sale掂咗嗰plan啦, "老鼠"做咗七個sesson已經好白吓, 我應該要double時間同埋錢, 廿個sesson落樓HK$6,980!!! 希望到時棚牙會令你地眼前一亮啦!!!
2. 大步檻過, 唔駛剝, 補幾隻再洗牙就ok啦, 分三次做, 大約HK2,500左右.........還得神落啦!!!
3. 老父就大鑊啦......要剝六隻斷牙再做成副假牙, 手術連倒模, 落樓HK$13,500!!! 梗係我俾啦!!!! 但係都要等兩三個月, 老竇, 食住粥先啦!!!

原來護理牙齒真係好重要, 前後兩星期就無咗兩萬啦, 你地試吓計一計, 剝一隻牙再植一隻假牙大概要三至四萬(以香港價值計算), 成年人共有32 顆牙齒：分別是八顆門牙、四顆犬齒、八顆小臼齒及12顆大臼齒, 要整晒成棚牙都要百幾萬, 仲要唔包一定植得到牙, 而且假牙食嘢無真牙嘴嚼食物而感受味道的感覺。所以諸位朋友, 你地都要好好護理呢啲終生伴侶!!!

獎座來了

等咗超過四星期既grand winner獎咗終於到手, 沒有想像中的喜悅, 心中暗忖應放在家中邊度呢?? 都底放邊度好呢? 弊........屋企又多咗一件因虛榮而擁有既身外物, 雖則話用嚟陪葬啫, 火化燒唔到個喎!!!!諗諗先!!!!

錯晒

我係早幾日寫嗰篇有關於On Pedder Display既Blog有回應喎!

話說有個聰明人閱畢後, 就盲中中咁走咗入去LV問有無環保袋賣, 點知俾個sales串............無喎(謝天華腔口).........仲話! 呀生, 你係咪話嗰toll pack 袋(唔知係咪咁寫)..........盛惠HK$6,xxx!!!!!!

聰明人........我無話係LV喎!!!!!!! 你知我同LV無乜緣份㗎! 你知㗎! 你了解㗎! 了解呀.......你明㗎!!!

我好感謝你同我去撲, 但係我真係同LV無乜緣份囉!

我講嗰個袋係Dylan's Candy Bar既環保袋, 小弟已經擁有啦!!!! 現讓諸位兄弟姊妹一睹為快!!!



再一次感謝聰明人, 累你白走一趟......心領了! 我覺得如果著你買俾我嗰條粉紅Speedo泳褲, 或者著訂番嚟嗰條Bare Back紅橙泳褲, 再配粉綠短褲加deep V心口有紫紅閃彩Pattern嗰件T恤, 著埋你係泰國買嗰對Havaianas白色人字拖...........拎埋呢個袋係中灣行個圈..........肯定俾人怒啤囉!!!!

中坑的回憶

上個月月尾睇咗Superband演唱會, 即係羅大佑, 李宗盛, 周華健同埋張震嶽, 如果唔係舊老細TK叫話一切睇, 我諗我未必會留意! 當然用得Superband嚟做號召梗係有jam歌, 合唱同埋個人獨唱部份啦! 佢地今次揀既歌比較冷門.......我好熟既歌佢地無唱, 所以識唔夠一半歌, 我想聽周華健既花心, 醉, 孤枕難眠, 明天我要嫁給你, 濃情化不開...........張震嶽既秘密, 愛我別走..........李宗盛鬼迷心竅, 羅大佑既愛人同志, 亞細亞的孤兒兒, 之乎者也.................全部欠奉...........你話唔失望, 假既!!!!!!! 雖然係咁, 但完全無影響我欣嘗既興至, 畢竟佢地真係一個年代既巨人, 貨真價實, 在表演裡的大度與淡定唔係一般歌仔姐仔可比!!!!

run down 如下
01 鄉親父老
02 公路
03 MEDLEY: 鹿港小鎮
04 MEDLEY: 分手吧
05 MEDLEY: 我终於失去了你
06 MEDLEY: 愛相隨
07 MEDLEY: 亡命之徒

--- 周華健 ---
08 MEDLEY: 穿過你的黑髮的我的手
09 MEDLEY: 為你我受冷風吹
10 MEDLEY: 傷心的歌
11 MEDLEY: 怕黑
12 似是故人來
13 天龍八部之難唸的經

--- 李宗盛 ---
14 當愛已成往事
15 讓我歡喜讓我憂 with 周華健
16 愛情有什麼道理
17 我是一隻小小鳥

--- 張震嶽 ---
18 路口
19 我要錢
20 MEDLEY: 愛情你我他
21 MEDLEY: 自由

--- 羅大佑 ---
22 美麗島
23 MEDLEY: 現象七十二變
24 MEDLEY: 鹿港小鎮
25 你的樣子
26 天使的眼淚 featuring 張震嶽

--- 縱貫線 ---
27 歌
28 風兒輕輕吹
29 東方之珠
30 戀曲1990
31 愛之初體驗
32 皇后大道東
33 亡命之徒
34 再見

ENCORE
35 真心英雄
36 朋友

個人嚟講, 雖然覺得周華健唱歌較為做作, 花腔甚多.......有啲似陳慧嫻!!!!!!!! 但是晚佢唱為你我受冷風吹, 真係好得!! 讚!!! 羅大佑不愧為音樂教父, 舉手投足都自有攝人氣度, 咁先係真正殿堂級唱作人; 張震嶽唔駛講啦, 佢唱Live仲好杷CD; 李宗盛俾我既感覺係英雄遲暮, 雖然當愛已成往事依然令人感慨萬千, 無論諗起既係已逝既哥哥或憶蓮或歌手本身或聽眾本人..........真係感慨萬千, 另外跟華健合唱讓我歡喜讓我憂真係好麻甩, 好佬.........不過別有韻味......好! 其他既合唱部份李宗盛佢好似唔係好夠氣同埋齋夾口形, 好似啫, 可能我睇錯!!!!

是晚有好多殿堂人物撐場, 有林青霞姐姐, Eason, 徐小鳳姐姐, 劉青雲伉儷等等...........Ms. 東方不敗依然明艷照人, 身型就略豐滿......無計啦, 闊太喎!!!! 徐小鳳姐姐依然雍容華貴...........郭靄明keep得好好!!!!!!! 唔知憶蓮有無嚟呢????

今次之後, 有兩位大哥隨住年事漸大, 唱唔唱到都未知, 所以今次呢個演唱會相當滿意!!!

先知先覺

係上年冬天至今年一月既時候, 小弟係自己既作品裡面已經好大膽咁選用螢光色, 而家諗番轉頭, 都可算係先知先覺, 行家睇見仲以為我真係跟得咁貼...... 其實都係平時夠八卦, 乜都睇一餐, 所以話做design真係唔懶得!

眼睛甜, 嘴兒甜, 感覺也甜!!!

上次講完公司樓下On Pedder的Window Display, 同事反應唔錯, 於是再斬四兩!!!

好唔好意思無報導到上次既display: The Cash is King!!!

上個禮拜佢地又換咗display啦,兩邊櫥窗concept完全唔同, 風格各異奇趣!!!!

主櫥窗係sell Dylan's Candy Bar, 一間紐約嚟既糖果店, 除咗賣糖果之外, 仲有以candy為主題既clothing同埋accessories賣添, 呢間店個老闆係Dylan Lauren, 呢位小姐係邊個? 咪係Ralph Lauren個女囉! 有錢女.......賣乜都得喇! 講番個display就梗係不惜工本啦, 唔單只colorful, 客人仲可以走入去買糖, 係鞋店裡面賣糖, 真係絕, 啲女仔女人見到糖, 心情特別好.......手都特別鬆, 袋都買多兩個, 鞋都賣多兩對啦! 係呢金融海嘯影響之下, 大多數人心情都唔係好㗎啦, 但係睇見呢啲咁colorful既糖果, 心情都會開朗啲!!!!!

副櫥窗就用咗pantone嚟做concept, PMS 43X嗰一版顏色不嬲都係我既摯愛, 中性得嚟又有層次, 無嘢得嚟幾有嘢, 襯黑, 白, 金, 銀, 紫, 黃, 紅, 綠, 藍都得! 雖然個display做得簡單俐落, 不過我見到就真係笑唔出, 因為又撞橋囉.........我有另外一本Annual Report又係用Pantone呢條橋, 當日早上present俾個客, On Pedder當晚就換咗呢個Display, 你話係咪傷盡我心的巧合續集!!!!!!!!!

相比On Pedder, 對面街既LV今期既display就真係令人失望啦, 用木箱呀, 紙皮箱呀, wrapping paper呀, 開箱封箱之類既concept出咗好幾百次啦, 仲囉番出嚟, 雖則橋唔怕舊, 最緊要受!!!!! 但係唔好行得咁緊要囉, 錢係要賺, 凈係再咁樣食老本, LV呢個Brand好快就可以送入老人院..........獻世同埋等死!!!!!











ps. 我幾鍾意佢嗰個環保袋, 顏色鮮艷...... 去中灣啱晒!!! 希望有貨啦.......因為今日問過, 連display item都俾人訂咗!!!!!