美食Encore之金門莊娥姐

話說上年七月跟同事們及雀友一起試過娥姐, 相距至今已經有大半年, 詳情見http://artmanartman.blogspot.com/2008/07/blog-post_24.html, 上星期五係好巧合既機會之下, 跟友人再度encore, 因為一般嚟講要排期三個月仲要訂親都要一圍, 人少的話就食唔到!

今次跟上次的菜譜略有改動, 計有:
蜜味鴨胸
桂花炒素翅
威化百花魚卷
竹笙扒鮮掌
刺參晌螺燉全雞
花香燻雞
蟹肉扒雙蔬
霸皇扒大鴨
油浸筍殼魚
薑米肉崧炒飯
海底椰雪耳煲蘋果


醒胃蝦片, 非常鬆脆, 食到停唔到口!!



水準依然, 依然係皮脆多汁, 肉好嫩配以沙律, 感覺非常醒神; 沙律的調味唔算重手, 保留咗蔬菜的清新, 加埋啲菘子同埋芝麻一齊食, 特別香口........very good!!!!!



炒得好香口, 蛋一啲都唔老, 又唔多油.......讚! 我覺得炒蛋要控制到剛熟, 嫩口, 滑而唔油膩係一件幾考功夫既事情!! 對唔住呀蘇, 我唔係踩你, 你要用咁多油炒既蛋, 好食極有限!!!



威化皮感覺幾好, 無春卷皮咁硬, 魚肉好彈口, 同埋唔覺好油膩!



竹笙好厚又扒得滑, 鵝掌已去骨, 啱晒我呢啲鍾意啖啖肉既懶人!!




對於鍾愛飲老火湯既我, 簡直係無得彈, 用全雞再加海參煲, 出嚟既湯唔油又唔膠口, 但係味道濃郁........Perfect!



仲好食過上次, 上次我覺得有少去老咗, 今次剛剛好, 肉嫩但保留了燻香的味道......好!



這道菜其實無乜特別, 但用料就好足, 啲蟹肉勁多.........正!




好食都震, 骨都稔埋, 當其他友人相繼飽得七七八八, 我就有你無你殺咗四小碗.......鴨胸裡面釀滿嗰啲唔知係糯米定綠豆, 加埋超稔既鴨肉, 真係好好好好好味呀(食神裡面薛家燕食叉燒飯嗰陣個樣)!!!!!!



我覺得上次油浸銀鱈魚好啲.......sorry!



好香口同埋炒得乾身, 薑米的清香可以refresh個口準備迎接甜品!!!



好鬼滋潤, 好重料, 每小碗都有好多材料, 唔太甜, 食完成個口同胃舒服晒, 無晒飽賬感!!!! So GOOD!!!!

是次聚會留下不少金句:
1.個女人癡咗.........佢真係癡咗線㗎!
2.嘩!........你去海灘呀!!!
3.你頭頂出煙啦, 小心個火警警報器灑水呀!

希望眾友人閱畢可以會心微笑, 期代下次聚會........BYE!!!!!!!!!!!