渣打馬拉松之妹仔後記

由artman話參加渣打馬拉松,我都係度擔心緊,到底佢得唔得㗎.....佢起唔起到身㗎!!! 答案係:佢起到身,因為佢之前嗰晚十點半已經就寢啦,而我......星期六晚打完波已經幾疲吓! 同波友食埋飯返到屋企已經十二點幾.......因為怕唔知醒做佢妹仔,唯有死頂唔訓囉!!!

好不辛苦用盡方法捱呢三個半鐘頭,包括上網,睇電視,打機,沖涼,洗碗,執嘢等等!!!

好不辛苦等到淩晨三點半佢起身.......妹仔工作正式開始!

首先係必備攜帶用品:
1.銀包(兩個)
2.鎖匙包
3.煙
4.藥
5.比賽場刊
6.相機
7.相機後備電池
8.PSP(用嚟打發時間)
9.毛巾(怕佢出汗冷親)
10.後備T恤(比佢更換)

話重唔重......輕都唔輕㗎.......ok!出發!!!

坐的士落維園,係高士威道落車之後就同佢影相啦, 同佢行去起點.......由於正式起點要參賽者先可以去, 唯有睇住佢自己上路啦, 佢留底既係.......一件風褸!!!

跟住我就開始大檸樂啦!!!

為咗搵嗰個------等候親人家屬朋友觀看參賽者揮手衝終點區, 來回咗糖街至高士威道兩次, 上埋天橋, 去咗五個exit, 問咗十個人先至搵到嗰個"等候親人家屬朋友觀看參賽者揮手衝終點區"!!!

睇睇個錶.......都只不過係五點咋老細, 做乜好呢?

第一時間影吓相跟手諗住排個頭位再打機啦.......點知有"同場加影"喎!!!!

劇目: 左右兩八婆之牙尖嘴利殺退笨實banner霸位麻甩佬!!!!!

話說剛去到等候區時人不太多, 但近終點的頭位已經無得七七八八, 我發現有個麻甩佬用一塊大概有十呎長既banner 鋪咗係地下霸位喎,我諗係啲打氣團嚟, 本來我都唔care, 以我既高度, 無影響啦....所以我咪企後少少囉! 係banner 左邊有個女人已經唔係好順超, 只係眼望望, 再加有意無意咁踢吓嗰條banner, 而個女人每踢一下個男人就鋪番一下, 但總算氣氛克制...........轉捩點係五時十分到場........呢位小姐睇中banner右邊有一隻腳板位既空隙就二話不說咁涉埋去, 仲向banner踢多兩腳tim, 個男人梗係寸步不讓.........仲話: 唔好意思, 呢個位我地仲會有人嚟㗎, 唔好意思!!! 個女人立即陳幸妤上身, 用高八度既聲線講: 咩呀! 乜可以咁霸位既咩, 信唔信我同食蕉講同埋投訴你呀拿.......跟住眼尾都唔望個男人自己講電話, 仲大大聲咁同佢啲friend咁訴說自己的委屈, 幾咁氣定神閒, 我望到佢仲踢多咗條banner一腳添!!!!

嗰男人驚魂未定, 六神無主之際, 梗係打電話拖馬嚟涉位啦...... 唔夠兩分鐘有另外一件蛋散嚟, 睇嚟係senior 啲咁囉....... 都未等個件蛋散有乜指示之際.......左邊的眼超超八婆立即發難, 她以淩波微步微踢banner, 記住!係微踢.......係我咁好觀察力同埋有高深內力既人先至察覺! 跟住再施展"劉慧卿+毛孟靜"上身, 好義正辭嚴咁講: "你地咁樣好selfish, 你地咁樣好自私囉! 每個人都係嚟為佢地既親朋戚友打氣, 你地咁樣, 其他人仲駛睇既!!!!"

時間分毫不差.......仲要英文行先.........無錯, 係selfish, 學嘢喇! 個兩件蛋散立即如鬥敗公雞......用咗十五秒既時間收拾好banner, 仲囉埋袋閃咗! 真係快!!!

我出場時間嚟啦, 係嗰兩件蛋散走咗五秒之後, 我立即發揮基佬某方面既基因------落井下石, 講是講非, 同埋變瞼! 我用一秒既時間即刻由置身事外既陌路人變做同聲同氣聲討霸位蛋散既正義朋友, 我即刻答訕: 咪係! 做人唔好咁自私嗎! 咁我就輕輕鬆鬆排頭位! 哈哈!!! 我後尾仲讓咗個頭位俾個五呎唔夠又想影相既女仔......... 形象滿分!!!

而時間亦剛剛好.......比賽開始! 我亦開始打機啦.......

但隨住比賽進行, 人亦越嚟越多, 開始非常擠擁, 而由於企得太耐, 手術後傷處及腳開始有反應了!!! 一路望計時, 腰同腳就越痛, 三十分鐘, 四十分鐘, 五十分鐘.........仲未見人, 唔會有事掛........係51'3X秒, 他向我揮手了, 可惜人太多, 拍不到他衝線, 遺憾!!!

諗住等幾分鐘他就會搵我, 等了又等, 再等了又等.......十五分鐘過去了........人影都無隻, 唔係有事呀嗎, 又無救傷車聲.......去咗邊呀!! 結過好似癲婆搵仔咁係幾個出口度來來回回..........小你呀!!! 再過咗五分鐘先見佢施施然咁行返嚟, 真係想煎巴佢!!! 可憐妹仔我已經準俾好毛巾俾佢抹汗, 跟住又要影相, 俾衫佢換怕佢冷親!!!! 可憐我條腰同腳痛到黐肺!!!!

計埋行去搵的士個條路, 差唔多有三粒鐘無坐過!! 係蓮香坐底已經係七點廿分, 食完返到剭企睇埋舞一叮已經係九點幾, 疲累到差啲係梳化訓著!!!

不過你係臨訓前同我講多謝我支持, 嗰下真係好sweet, I AM PROUD OF U!!!只要你繼續跑, 我就繼續幫你拿毛巾!!!

嗰日訓醒本來schedule咗去攝太歲, 但係我想話, 我隻腳真係訓訓吓賣老抽! 你地話, 跑嗰個無事, 打氣嗰個就因為來回維園多次而抽筋......咩世界!!!

ps: 要睇相, 問artman啦!!!!